साउन २४, रामपुर (रमा भण्डारी) – रामपुर, पाल्पामा ३१औं विश्व आदिवासी दिवस–२०८२ को मुख्य समारोह उत्साहपूर्वक सम्पन्न भएको छ। लुम्बिनी प्रदेशका स्वास्थ्य मन्त्री तथा आदिवासी जनजाति महासंघ जिल्ला समन्वय परिषद् पाल्पाका सल्लाहकार खेम बहादुर सारु प्रमुख अतिथि रहनु भयो।

उद्घाटन गर्दै मन्त्री सारुले भाषा, कला र संस्कृतिको संरक्षण गर्नुपर्ने आवश्यकता औंल्याउँदै आदिवासी जनजातिको अधिकार स्थापना र उपलब्धीको रक्षा गर्न प्रदेश सरकार प्रतिबद्ध रहेको बताए। उनले राज्य सञ्चालनको मूल प्रवाहमा आदिवासी समुदायलाई ल्याउन नेतृत्व विकास अपरिहार्य भएको उल्लेख गरे।

अधिवक्ता केहरसिंह रानामगरले स्थानीय तहसहित तीनै तहका सरकारले सर्वोच्च अदालतको आदिवासीसम्बन्धी फैसला कार्यान्वयन गर्नुपर्ने बताए। प्रदेश सांसद तथा उद्योग, पर्यटन तथा अर्थ समितिका सभापति राजु प्रसाद श्रेष्ठले आदिवासी आयोग सक्रिय नहुँदा अधिकारको कार्यान्वयन कमजोर भएको टिप्पणी गरे।

रामपुर नगरपालिकाका कार्यवाहक प्रमुख कपिल खाँड र समाजसेवी सन्दिप रानाले आदिवासी समुदायको योगदान प्रशंसनीय रहेको उल्लेख गर्दै जल, जमिन र जंगलमाथि अधिकार सुनिश्चिततासहित पेशा र संस्कृति संरक्षणमा राज्य गम्भीर बन्नुपर्नेमा जोड दिए।

“प्राकृतिक स्रोत (जल, जमिन, जंगल) माथि आदिवासी जनजातिको अधिकार सुनिश्चित गरौँ” भन्ने मूल नाराका साथ आयोजित कार्यक्रममा विभिन्न जातीय संघ–संगठनका नेता तथा नागरिकको उल्लेख्य सहभागिता थियो।

कार्यक्रममा कुमाल समुदायको सोरठी, नेवार समुदायको धिमे नाच र मगर समुदायको झ्याउरे नाच प्रस्तुत गरिएको थियो।
कार्यक्रमको सञ्चालन बिन्दु श्रेष्ठ र सुनिता रानाले गरेका थिए भने स्वागत उपाध्यक्ष पदम कुमाल र धन्यवाद उपाध्यक्ष सरस्वती सोमैले व्यक्त गरेका थिए। समारोह होटल नमस्तेको सभाहलमा सम्पन्न भएको हो।

फिचर पोस्ट