📅 साउन २५
रामपुर पाल्पा — राम्चे सामुदायिक बन उपभोक्ता समूहले आफ्नो क्षेत्रभित्रको खाली स्थानमा वृक्षारोपण कार्यक्रम सम्पन्न गरेको छ।

कार्यक्रम समूहका अध्यक्ष विष्णु प्रसाद बस्यालको अध्यक्षतामा सम्पन्न भएको थियो भने, अन्तर्राष्ट्रिय विपि चिन्तन प्रतिष्ठानका अध्यक्ष तथा कालिगण्डकी फाउन्डेसनका सल्लाहकार सन्दिप राना मुख्य अतिथि रहेका थिए।

मुख्य अतिथि रानाले आफ्नो सम्बोधनमा “हरियो बन नेपालको धन हो” भन्दै वनको संरक्षण र प्रजातीय विविधताको महत्त्वबारे प्रकाश पारे। उनले पहिले वनमा हर्रो, बर्रो, अमल, चिउरी, टाकी, बेलौती, शितलचिनी, तेजपत्ता जस्ता बहुमूल्य जडीबुटी पाइने तर अहिले ती हराउँदै गएको उल्लेख गर्दै, यस्ता प्रजातिका बिरुवा रोप्नु वन्यजन्तु र मानव दुबैका लागि लाभदायी हुने बताए। साथै, जलवायु परिवर्तन न्यूनीकरणमा वनको अपरिहार्य भूमिका रहने भन्दै वन सबैको साझा सम्पत्ति भएको स्मरण गराए।

सामुदायिक वन महासंघका जिल्ला अध्यक्ष कृष्णप्रसाद श्रेष्ठले पनि राष्ट्रिय वन दिवसको अवसरमा वृक्षारोपणको आयोजना गर्नु प्रशंसनीय कार्य भएको बताए। उनले कालिगण्डकी फाउन्डेसनले उपलब्ध गराएका ६ सय बिरुवाप्रति धन्यवाद व्यक्त गरे।

कालिगण्डकी फाउन्डेसनका अध्यक्ष निलकण्ठ भण्डारीले वनको महत्व बुझेर संस्थाले विभिन्न प्रजातिका बिरुवा उपलब्ध गराएको जानकारी दिए।

कार्यक्रममा जनप्रतिनिधि, सामुदायिक वन महासंघका पदाधिकारी, उपभोक्ता, पत्रकारलगायतको उपस्थिति रहेको थियो। संचालन उपभोक्ता समितिका सहसचिव जित बहादुर थापाले गरेका थिए।