महिला तथा बालिका माथि हुने हिंसा विरुद्ध न्याय सम्बोधनका लागि सिफारिस प्रणाली कार्यविधि २०८२ सार्वजनिक
प्रकाशित : २०८२ भदौ १५ गते २०:४१
भदौ १५, रामपुर (पाल्पा) –
महिला तथा बालिका माथि हुने हिंसा विरुद्ध न्याय सम्बोधनका लागि सिफारिस प्रणाली कार्यविधि २०८२ रामपुर नगरपालिका पाल्पामा सार्वजनिक गरिएको छ।
रामपुर नगरपालिकाको आयोजनामा, महिला कानुन र विकास मञ्चको सहयोग तथा सारथि नेपाल पाल्पाको समन्वयमा सम्पन्न कार्यक्रममा नगर प्रमुख रमण बहादुर थापाको अध्यक्षता थियो। कार्यक्रममा प्रमुख अतिथि राष्ट्रिय सभा सदस्य राजेन्द्र लक्ष्मी गैहेले कार्यविधि सार्वजनिक गर्नुभयो।
सार्वजनिक कार्यक्रममा उहाँले, “कार्यविधि बनेपछि पालिकामा काम गर्न सहज हुनेछ। हिंसामा परेका महिला तथा बालबालिकाले सिफारिसका आधारमा सहयोग पाउने छन्। अब कानुन सबैका लागि कार्यान्वयन हुने छ,” भन्नुभयो।
कार्यक्रम उपप्रमुख बालकुमारी थापाको स्वागत मन्तव्यबाट सुरु भएको थियो। कार्यक्रममा अधिवक्ता सविन श्रेष्ठले कार्यविधिको उद्देश्यबारे प्रष्ट पार्दै सामाजिक सञ्जालकै कारण धेरै हिंसाका घटना बढिरहेको उल्लेख गर्नुभयो। उनले हिंसा न्यूनिकरणका लागि सबैको सहकार्य आवश्यक हुनेमा जोड दिनुभयो।
सो अवसरमा सारथि नेपाल पाल्पाकी अध्यक्ष विष्णुमाया थापा, इलाका प्रशासन कार्यालय प्रमुख उदय भट्टराई, इलाका प्रहरी कार्यालय प्रमुख रामबहादुर नेपालीलगायतले पनि आफ्ना विचार राखेका थिए।
कार्यक्रमको सञ्चालन महिला तथा बालबालिका शाखा प्रमुख पुजा परियारले गर्नुभएको थियो।
Facebook Comment