भदौ १४, रामपुर (रमा भण्डारी)

नेपाल महिला संघ रामपुर नगर कार्यसमितिको आयोजनामा ३२ औं खुल्ला तिजगीत प्रतियोगिता सम्पन्न भएको छ। हरेक वर्ष ऋषि पञ्चमीको भोलिपल्ट हुँदै आएको यस प्रतियोगितालाई निरन्तरता दिँदै यस वर्ष पनि भव्य रूपमा आयोजना गरिएको हो।

नेपाल महिला संघ रामपुर नगर समितिकी सभापति सारदा आचार्यको अध्यक्षतामा भएको कार्यक्रममा नेपाली कांग्रेसका केन्द्रीय सहमहामन्त्री एवं संविधान सभा सदस्य महालक्ष्मी उपाध्याय ‘डिना’ प्रमुख अतिथि रहनु भएको थियो। उहाँले उद्घाटन गर्दै अझै पनि समाजमा महिला र पुरुषलाई हेर्ने दृष्टिकोण फरक रहेको बताउँदै संविधानले प्रदान गरेका अधिकार र कानुन बने पनि सामाजिक रूपान्तरण पर्याप्त नदेखिएको उल्लेख गर्नुभयो। समान अवसर सुनिश्चित गर्न महिला–पुरुष दुवैको सक्रियता आवश्यक रहेको उहाँको भनाइ थियो।

कार्यक्रममा राष्ट्रिय सभा सदस्य राजेन्द्रलक्ष्मी गैरेले महिला अधिकारका लागि ऐतिहासिक रूपमा चल्दै आएको संघर्षलाई स्मरण गर्दै कालीगण्डकी नदी संरक्षणमा समेत हाम्रो साझा प्रतिबद्धता आवश्यक रहेको बताउनुभयो। लुम्बिनी प्रदेश सदस्य विष्णु माया ढकालले संस्कृतिको संरक्षणसँगै महिला जागरणमा प्रतियोगिताले महत्वपूर्ण योगदान पुर्‍याइरहेको धारणा राख्नुभयो।

त्यस्तै, नेपाल महिला संघकी केन्द्रीय सदस्य पवित्रा पौडेल ढकालले तिज पर्वले माईती र चेलिवेटीबीचको सम्बन्ध अझ प्रगाढ बनाउने बताउनुभयो। रामपुर नगरपालिकाकी उपप्रमुख बालकुमारी थापाले महिलालाई आर्थिक रूपमा सशक्त बनाउन नगरपालिका निरन्तर सहयोग गरिरहेको जानकारी दिनुभयो। नेपाल मुस्लिम संघका केन्द्रीय उपाध्यक्ष हजिल दिन मियाँले शुभकामना व्यक्त गर्नुभयो।

प्रतियोगितामा १४ समूहको सहभागिता रहेको थियो। निर्णायक मण्डलका संयोजक दिपेन्द्र प्रसाद भट्टराईका अनुसार,

• प्रथम : रामपुर–१० की मिना न्यौपाने समूह (नगद २० हजारसहित प्रमाणपत्र)
• द्वितीय : नेपाल विद्यार्थी संघकी शशी ढकाल समूह (नगद १५ हजारसहित प्रमाणपत्र)
• तृतीय : नारी जागरण आमा समूह, चापाकोट–७ (नगद १० हजारसहित प्रमाणपत्र)
• सान्त्वना : चापाकोट–७ केवलगारीकी गोमा गैरे तथा मिना डोटेल, रामपुर–६ विजयपुर

कार्यक्रम उपसभापति सावित्रा गैह्रेको स्वागत मन्तव्यबाट सुरु भएको थियो भने सञ्चालन सचिव जमुना राना र पार्वती परियारले संयुक्त रूपमा गर्नुभएको थियो।

👉 फिचर पोस्ट